Við eigum að laða til okkar álfa

Viðtal um álfa í Morgunblaðinu. Hér má nálgast pdf útgáfu af bls 10 og hér má nálgast pdf útgáfu af bls. 11.

Eldur, ís, álfar og tröll í garðinum

Viðtal úr Fréttablaðinu eftir Friðriku Sigríði Benónýsdóttur (pdf með myndum)

Eldur, ís, álfar og tröll í garðinum

Björn Jóhannsson landslagsarkitekt hefur sent frá sér bókina Draumagarður – hönnun og útfærslur þar sem hann fjallar um hönnun garða og útisvæða, birtir fjölda teikninga og mynda og gefur góð ráð. Hann segir haustið og veturinn einmitt vera rétta tímann til að skipuleggja garðinn.

„Ég hef sérhæft mig í garðhönnun,“ segir Björn. „Ég útskrifaðist sem landslags arkitekt árið 1993 og það greinir mig kannski mest frá öðrum landslagsarkitektum að ég legg mikið upp úr því að teikna á staðnum. Það fer þá þannig fram að ég sest niður að morgni dags með eigendum garðsins og við spjöllum saman fram eftir degi, förum út og mælum og spjöllum meira og áður en ég kveð þau er teikningin til og þau geta hringt í verktakann samdægurs.“

En er einhver að hugsa um garða á þessum árstíma? „Já, það hefur verið þannig í gegnum tíðina. Fólk kemur úr sumarfríi á haustin, búið að upplifa gott sumar og er strax farið að hugsa um að gera næsta sumar ennþá betra. Það er líka mjög sniðugt að fara í hönnunina á þessum tíma, klára útfærslur upp úr áramótum og vera búinn með framkvæmdirnar fyrir vorið. Það er hægt að framkvæma allt árið um kring og það er líka miklu auðveldara að ná í verktaka á veturna.“

Á myndunum í bók Björns eru hellulagðir stígar og torg og viðar pallar mjög áberandi, er það vinsælast í garðhönnun núna? „Mín sérhæfing liggur dálítið mikið í hellunum og timbrinu,“ segir Björn og hlær. „Þessi efni hafa miklu meira notagildi og eru auðveldari í viðhaldi en grasflatir. Hér mikil væta og bleytan situr lengi í grasinu á meðan pallar og stéttir þorna nánast strax. Að því sögðu vil ég taka fram að það eru geysileg tækifæri í að nota grasflatir miklu meira sem dvalarsvæði. Ég hef oft bent á það að hægt er að gera grasflatir mjög sléttar og fínar og vera með garðhúsgögn þar allt sumarið.“

Hvernig finnst Birni garðhönnun hafa þróast þessi tæpu tuttugu ár sem hann hefur verið starfandi? „Þróun í garðhönnun er náttúrlega ofsalega hæg. Það sem ég er að teikna í dag verður framkvæmt eftir tvö ár og ekki orðið myndatökuhæft fyrr en fjórum árum síðar, þannig að það sem ég er að taka myndir af sem því nýjasta í dag er orðið fimm til sjö ára gamalt,“ segir Björn. „En það sem er að gerast í þjóðfélaginu núna er að íslensk og skandinavísk hönnun er komin í tísku. Ég sé fram á að miklu meira verði sótt í fyrirmyndir úr íslenskri náttúru og íslenskum þjóðsögum næstu árin.

Mín vinna mun á næstunni einkennast af því að horfa á eld, ís, tröll og álfa sem myndgervingar fyrir grunnhugmyndir í hönnun.

Annað sem fólk er að uppgötva er að það er ekki hægt að vera með garð á Íslandi án þess að búa til skjól, þannig að það sem við munum sjá á næstu árum eru nokkurs konar útieldhús þar sem er innbyggt grill, þak yfir og jafnvel vaskur. Ég er sannfærður um að það muni aukast mikið að garðurinn verði innréttaður nánast eins og íbúð og fólk verji mun meiri tíma þar.“ - fsb

Viðtal við höfund Draumagarðs

Í garði hins glaða manns - eftir Sigurð Boga Sævarsson

„Með þessari bók fær garðeigandinn innsýn í hugarheim landslagsarkitektsins og aukinn skilning á því hvað liggur að baki góðri hönnun,“ segir Björn Jóhannsson landslagsarkitekt sem fyrir nokkrum dögum sendi frá sér bókina Draumagarður. Þar er að finna margvíslegar hugmyndir og ráð að því hvernig best verði staðið að hönnun garða – sem sumum er ef til vill hausverkur. Getur hins vegar verið heillandi viðfangsefni sé réttum ráðum fylgt og vela ð verki staðið.

“Kreppan hafi ýtt mér af stað í að ljúka við bókina en ég hef unnið eitthvað í henni á hverju ári í um 10 ár. Mér finnst mikilvægt að þegar fólk útfærir garðana sína, hafi það nóg af hugmyndum til vinna með. Þetta er mitt innlegg í hugmyndabanka íslenskra garðeigenda,” segir Björn um bókina sem er í stóru broti þannig að ljósmyndir og teikningar njóti sín sem allra best. Þá eru  Hönnunarleiðbeiningar eru einfaldar og skýrar.

„Með þessari bók fær garðeigandinn innsýn í hugarheim landslagsarkitektsins og aukinn skilning á því hvað liggur að baki góðri hönnun. Ein mesta áskorun íslenskar garðeigenda er glíman við veðrið. Hér er næðingssamt og sólarstaða oft lág. Þannig skiptir máli að vindi sé beint frá dvalarsvæðum, því þegar búið er til skjól þarf líka að huga að því hvert vindurinn blæs,“ segir Björn sem telur að tískustraumar í garðhönnun hafi ekki breyst svo ýkja mikið þrátt fyrir að efnahagur  fólks sé allt annar nú en var fyrir fáum árum. Munurinn snúist fyrst og fremst um framkvæmdastílinn. Nú sé verkefnum skipt niður í fleiri áfanga og garðeigendur njóti

Stundum er sagt að enginn maður syngi nema hann sé glaður! Hvernig er garður hins glaða manns? „Að sjálfsögðu er miðpunkturinn í þeim garði útisturta því það er hvergi betra að syngja en í sturtu. Annars jafnast smá garðvinna auðveldlega á við langan jóga tíma eða góðan skammt af geðlyfjum,” segir Björn og hlær „Þess vegna mundi ég segja að garður hins glaða manns sé garður þar sem handbragð eigandans fær að njóta sín. Allur heimurinn er garður hins hamingjusama manns og ég held að hver og einn eigi að fá að upplifa garðinn sinn á eigin hátt.”