Umsókn í Framkvæmdasjóð ferðamannastaða

Þjónusta sem sparar tíma og kemur verkefnum af stað

Það getur verið tímafrekt og flókið að sækja um styrk úr Framkvæmdasjóði ferðamannastaða, þar sem umsóknir þurfa að uppfylla fjölmörg skilyrði og reglur. Þjónustan sem er í boði einfaldar ferlið og hjálpar við að tryggja styrki fyrir uppbyggingu og verndun ferðamannastaða, ásamt því að hanna staðina í samræmi við kröfur sjóðsins.

Þjónustan felur í sér:

1. Mat á styrkhæfi verkefnisins:

   • Verkefnið er metið með tilliti til þess hvort það uppfyllir skilyrði sjóðsins. Greint er hvort það styðji við markmið sjóðsins, eins og verndun, uppbyggingu eða bætt aðgengi að ferðamannastöðum.

2. Undirbúningur umsóknargagna:

   • Umsóknir þurfa að vera vel skipulagðar og ítarlegar. Með þjónustunni er tryggt að öll nauðsynleg fylgigögn séu til staðar, þar á meðal teikningar, leyfi, fjárhagsáætlanir og samningar við landeigendur, ef við á.

3. Skrif og skil umsókna:

   • Umsóknarferlið er tekið að fullu yfir, þar sem umsóknin er fyllt út með öllum nauðsynlegum upplýsingum og henni skilað innan rétts tíma. Jafnframt er fylgst með framvindu umsóknarinnar.

4. Fjármál og áætlunargerð:

   • Unnið er með trúverðuga og nákvæma fjárhagsáætlun, ásamt raunhæfum tímaramma fyrir framkvæmdina, sem er lykilatriði til að tryggja styrkveitingu.

Hönnun ferðamannastaða – Sjálfbær og varanleg lausn

Auk þess að sjá um styrkumsóknir er einnig boðið upp á heildstæða þjónustu við hönnun ferðamannastaða. Góð hönnun er grunnforsenda þess að ná markmiðum sjóðsins um verndun, öryggi og bætt aðgengi. Með reynslu af verkefnum tengdum innviðum ferðamannastaða er hægt að tryggja:

1. Vandaða hönnun göngustíga, útsýnispalla og annarra innviða:

   • Sérhæfð hönnun sem tekur tillit til náttúrunnar og stuðlar að verndun hennar. Lausnir eru þróaðar þannig að þær minnka álag á umhverfið án þess að skerða upplifun ferðamanna.

2. Sjálfbærni og langvarandi lausnir:

   • Unnið er með sjálfbærar lausnir sem tryggja að mannvirki þoli álag frá aukinni ferðamennsku og uppfylli umhverfiskröfur. Einnig er lögð áhersla á auðvelt viðhald og langvarandi virkni.

3. Sköpun svæða sem höfða til ferðamanna:

   • Hönnun ferðamannastaða er lykilatriði til að auka ánægju ferðamanna og gera staðinn meira aðlaðandi, allt í sátt við umhverfið og samfélagið.

     
     

Af hverju að nýta þessa þjónustu?

Með sérhæfingu í uppbyggingu ferðamannastaða er boðið upp á þjónustu sem tryggir árangur, bæði við styrkumsóknir og hönnun. Með þjónustunni:

• Sparast tími og fyrirhöfn þar sem sérfræðingar taka yfir umsóknarferlið.

• Veitt er fagleg ráðgjöf um hönnun og uppbyggingu sem uppfyllir skilyrði sjóðsins.

• Líkurnar á styrkveitingu aukast með vel skipulagðri og faglegri umsókn.

Hugmyndir að verkefnum sem gætu nýtt sér styrki úr Framkvæmdasjóði geta orðið að veruleika með réttri leiðsögn og stuðningi. Með þessari þjónustu er hægt að leiða verkefnið frá hugmynd að veruleika og tryggja að það uppfylli öll skilyrði og kröfur.

Straumar og stefnur í görðum 2024

Nú er komið að því að spá fyrir um áherslur í garðhönnun 2024. Tíska í garðhönnun sveiflast ofurhægt, enda miðast framkvæmdir yfirleitt við notkunina næstu 20-30 árin. Því eiga allar hugmyndinar frá því í fyrra við, https://www.urbanbeat.is/post/straumar-og-stefnur-2023, en þá fjölluðum við um kryddjurtabari, trúnóbekki, útieldhús, íþróttasvæði og krakkaholur. Til viðbótar við þetta eru áberandi breytingar að eiga sér stað og flestar þeirra snúa að meira notagildi, heilsu, sjálfbærni og endurnýtingu. Aðrar snúa að skemmtilegum hugmyndum um liti og nýstárlegar útfærslur.

Blokkargarðar fá uppreisn æru

Garðarnir sem hafa setið á hakanum síðustu árin eru garðar fjölbýlishúsa. Byggingaverktakar hafa alla jafna gengið frá lóðum á sem einfaldastan hátt með bílastæðum og grasflöt. Nú er kominn tími til þess að blokkarbúar fái jafnmikil lífsgæði í sínum görðum og sérbýliseigendur. Hlutar þessara lóða verða girtir af til þess að hægt sé að leyfa börnum að hlaupa um áhyggjulaust. Gróðri verður plantað og skjólveggir reistir til þess að útbúa hlý sólarsvæði sem snúa mót suðri. Útieldhús, gróðurhús og svæði til að snæða verða brátt ómissandi hluti góðrar blokkarlóðar.

Allt í rusli

Rusl og flokkun þess mun hafa mikil áhrif á garðhönnun árið 2024 þar sem öll sveitarfélög eru að rembast við að ná utan um þessi mál. Um leið og sorprennum í blokkum verður lokað munu húsfélög koma sér upp öflugri sorpflokkunaraðstöðum ýmist í litlum húsum á lóð eða í djúpgámum neðanjarðar. Í sérbýlum mun sorpflokkun að hluta til færast í geymslur út í garði og losa þannig pláss innandyra.

Gamlar hellur og fúgur í forgrunni

Með meiri áherslu á endurnýtingu og hringrásarhagkerfið verður áhersla á að nýta frekar en að henda. Samkvæmt rannsóknum heldur steypa áfram að styrkjast með aldri og eru því gamlar hellur ekki endilega síðri en nýjar. Þróun á fúguefni fyrir hellur eru á fleygiferð og hér á landi er m.a. verið að skoða þara sem íblöndunarefni í fúgur en í þaranum er alginate sem bindur sandinn í fúgunni. Þannig má taka gömlu hellurnar upp, laga undirlagið og leggja þær í nýju munstri með fúgum sem fjúka ekki burtu.

Litir að mýkjast

Litapalletan utandyra tekur gjarnan mið af þróun innanhúss. Þannig eru litir að taka á sig jarðbundnari blæ og byggingarefni að verða veðruð í útliti. Nú er einnig hægt að fá nákvæmari litablöndur fyrir girðingar og því fleiri blæbrigði í litapallettum.

Grasflatir og blómaengi sem miðdepill

Að lokum þá sjáum við að í okkar hönnun er grasflötin að verða miðdepill. Pallarnir og stéttarnar umlykja gjarnan grassvæði sem sláttuvélmenni sjá um að hirða. Önnur grassvæði fá að vaxa og eru slegin einu sinni á ári þannig að úr verði fagurt blómaengi.

Takk fyrir að lesa :-)

Garðar við blokkir – ný framtíðarsýn

Þegar ég horfi út af svölunum niður á auðu grasflötina fyrir aftan blokkina get ég ekki annað en fyllst öfund út í þá sem eiga gróðursælan garð með palli, útieldhúsi og hengirúmi. Hvað ef allir í blokkinni gætu komið sér saman um að gera útisvæðið þannig að maður vildi miklu frekar vera úti í garði, heldur en inni fyrir framan skjáinn? Væri ekki geggjað að geta farið út í garð, lyft nokkrum ketilbjöllum, skellt sér svo í gufuna og grillað í vel útbúnu útieldhúsi? Svo þegar sólin færi að síga myndi maður færa sig á kvöldsvæðið, kveikja upp í útiarninum og sitja þar og kjafta við fjölskyldu og vini fram eftir kvöldi.

En hver segir að þetta sé ekki hægt? Hér á eftir ætla ég að fara yfir hvað þarf til þess að blokkarlóðin geti orðið að vin fyrir alla íbúana.

Afþreying fyrir alla

Það þurfa allir að hafa eitthvað við sitt hæfi. Börnin þurfa leiksvæði og foreldrar þurfa setsvæði þar sem auðvelt er að fylgjast með börnunum. Það þurfa að vera góðir og sléttir stígar þannig að allir geti fengið sér göngutúr auk þess sem spræka liðið þarf svæði til að gera meira krefjandi æfingar. Unglingarnir þurfa sitt svæði til að hanga og gera þarf ráð fyrir að þeir sem vilji geti ræktað kryddjurtir og grænmeti. Svo þarf að sjálfsögðu fjölnota grasflatir fyrir boltaleiki, kubb og krokket.

Samkomustaður hússins

Það er ekkert sem sameinar fólk betur en matur og því er útieldhús eða grillskýli alveg ómissandi. Þar má líka vera nóg af sætum, bæði undir þaki og undir berum himni. Föst borð og bekkir, færanlegir sófar og massív langborð eru bara hluti þess sem getur gert veislurnar úti ógleymanlegar. Að mínu mati er þó lykilatriði að útbúa gott skjól með veggjum og gróðri auk þess að útbúa þak yfir hluta svæðanna. Þannig þarf smá rigning ekki að verða til þess að allir flýi aftur inn.

Aflokaðir staðir fyrir alla tíma dags

Sól og skjól er þau tvö orð sem oftast bera á góma þegar íslenskir garðar eru ræddir. Yfirleitt er sólin á mismunandi stöðum, allt eftir tíma dags og því þess virði að skipuleggja svæði fyir morgunkaffið, daginn og kvöldið. Svo þarf með hjálp gróðurs, skjólveggja og jafnvel hóla að mynda skjól fyrir þessi svæði. Það skiptir líka máli að garðurinn og svæðin innan hans fái að vera í friði fyrir forvitnum augum og umferð almennings. Því þarf að skýla þessum svæðum og jafnvel garðinum öllum og gera þannig að einkasvæði þeirra sem búa í blokkinni.

Enn lengra út fyrir kassann

Heitur pottur, kaldur, gufubað og útisturta er kombó ársins í einkagörðum. Það er aðeins meira flækjustig við þetta í blokk heldur en við einbýli en með því að loka af svæði innan garðsins mætti alveg skoða þessi mannvirki. Það er t.d. hægt að vera með gufubað sem íbúar hússins geta fengið lykil að og bókað tíma eftir samkomulagi.

Hvað þarf til?

Til þess að þetta geti orðið að veruleika þarf góða hönnun sem styður við skjólmyndun og útfærir vel allar þær skemmtilegu hugmyndir sem íbúar hússins sjá fyrir sér. En þá er ekki öll sagan sögð því svona verkefni þarf að fjármagna. Það er enginn vafi í mínum huga að ef vel er að verki staðið þá muni verðmæti íbúðanna í húsinu hækka í samræmi við það sem svona garður kostar. Því væri eðlilegast að fjármagna framkvæmdir í gegnum húsfélagið og athuga hvort einhver banki vildi ekki bjóða upp á garðalán fyrir fjölbýlishús.

Takk fyrir að lesa :-)