top of page
Search

Straumar og stefnur 2023

    Updated: Mar 31, 2023

    Nú þegar nýtt ár er gengið í garð er ekki seinna vænna að setja sig í spor völvunnar og spá fyrir um helstu strauma og stefnur í garðhönnun árið 2023. Síðasta ár var alveg magnað og við höfum aldrei séð jafn marga garða byggjast upp með hugmyndafræði Urban Beat að leiðarljósi. Sú hugmyndafræði snýst um að hanna þannig að það sé jafn skemmtilegt að vera úti í garði og að vera inni, helst allan ársins hring.




    Við höfum unnið með ýmsar nýstárlegar hugmyndir en fyrir fjórum árum leit Kampavínsveggurinn dagsins ljós en það er fastur veggur í barborðshæð, þar sem hægt er að leggja frá sér diska, bolla og kampavínsglös. Á síðasta ári var þessi hugmynd tekin enn lengra og byggður garður þar sem þema var kampavín og samkvæmi. Sá garður fékk nafnið Kampavínsgarðurinn enda í eigu þeirra sem eiga og reka Kampavínsfélagið. Kampavínsgarðurinn var svo tekinn sérstaklega fyrir í þætti Sjafnar Þórðar, Matur og Heimili þar sem ferlinu öllu voru gerð góð skil. Þar var eigendum, hönnuði og verktökum fylgt eftir allt frá fæðingu hugmyndar að fyrstu garðveislunni.



    Í hönnun og framkvæmdum ársins 2022 var áberandi hvað garðeigendur vildu fá tækifæri til eyða meiri tíma í garðinum. Þeir vildu aukna möguleika til afþreyingar og tók hönnun mið af því. Þannig verður hægt að nýta garðinn mjög vel að sumri, en einnig á öðrum tímum. Þar spila stærstu rulluna smáhýsi, skýli, gróðurhús, geislahitarar, heitir pottar, sánur og útieldhús. Þannig er hægt að slappa af, stunda íþróttir og elda góðan mat í garðinum þótt sólin sé ekki hátt á lofti.


    Hér á eftir förum við yfir nokkra þætti sem við spáum að verði áberandi í hönnun garða og framkvæmdum við þá árið 2023.


    Kryddjurtabar og Trúnóbekkur

    Fyrir marga er Kampavínsveggurinn gömul frétt en hann kom fyrst fram á sjónarsviðið þegar ég flutti heim frá Svíþjóð með aragrúa af skemmtilegum hugmyndum. Þetta er í raun bara venjulegur veggur í sömu hæð og barborð, með góðri borðplötu og breidd sem rúmar snittur, bjórkönnur og að sjálfsögðu kampavín, kælifötu og glös. Kampavínsveggurinn fékk á síðasta ári tvo arftaka og munu þeir verða áberandi á því næsta. Annar þeirra mun breyta talsvert möguleikum til matargerðarlistar utandyra en það er Kryddjurtabarinn. Kryddjurtabarinn er upphækkað gróðurbeð útfært þannig að auðvelt sé að sjá þar um nokkrar vel valdar kryddjurtir. Staðsetning er að sjálfsögðu í nágrenni útieldhússins og því auðvelt að grípa lófafylli af uppáhalds blaðkryddinu og strá yfir steikina eða salatið.


    Hinn arftaki Kampavínsveggsins er Trúnóbekkurinn sem fékk nafn sitt á aðalfundi Félags skrúðgarðyrkjumeistara þegar þeir fengu að skoða nýhannaðan garð í sýndarveruleika. Kampavínsgarðurinn varð fyrir valinu sem sýnidæmi í sýndarveruleika og þegar garðyrkju meistararnir settu upp sýndarhjálminn upphófst skemmtilegt samtal um þennan veisluvæna garð. Eitt af því sem prýðir garðinn er innbyggður bekkur með hallandi baki og sléttri syllu efst á bakinu. Þar má leggja frá sér glös, matardiska og annað gagnlegt. Eftri nokkra ummræðu fékk þessi bekkur nafnið „Trúnóbekkurinn“ en þeim þótti upplagt að nýta hann í lok veislunnar fyrir trúnaðarsamtöl en þá má leggja frá sér síðasta drykk kvöldsins á glasasyllunna. Við gerum ráð fyrir áframhaldandi þróun og skemmtilegum útfærslum Trúnóbekksins á næsta ári.




    Útieldhúsið á næsta stig




    Fyrir 20 árum var nóg að finna skjólgóðan stað fyrir grillið og eiga góða hlíf til að skella yfir þegar það var ekki í notkun. Svo var það aðallega notað á sumrin og geymt inni í bílskúr yfir vetrartímann. Fyrir 10 árum færðist svo í aukana að grilla allt árið og þá þurfti að vera pláss fyrir grillið, smá vinnusvæði og stað til að geyma grillið eða skýla því á veturna. Í fyrra voru svo aðstæður fyrir grill og útieldhús hreinlega komnar á annað og hærra plan. Það þurfti að vera pláss fyrir gasgrill og kolagrill ásamt vinnuborði með góðu gólfplássi til að athafna sig. Þar átti einnig að vera pláss fyrir lítinn gasdrifinn pizzaofn og helst það stórt þak að svæðið rúmi pláss fyrir 4-6 mann borð til að snæða við. Þannig er ekkert mál að borða úti þegar aðeins dropar úr skýjum. Við spáum því að þessi þróun muni halda áfram og geymslur fyrir mat, vaskar, sambyggðar geymslur fyrir grillið og ýmis búnaður sem ekki hefur sést utandyra verði meira áberandi í útieldhúsum landsmanna.


    Íþróttasvæði og fullbúið spa

    Árið 2022 var árið sem dekur íslensku sundlauganna færðist inn í garðinn. Heiti potturinn hefur verið gríðarlega vinsæll síðustu áratugi en með áhrifum frá hinum norðurlöndunum og víðar hafa bæst við kaldur pottur, sauna og útisturta. Þannig er garðurinn af verða sannkallað spa-svæði. Með auknum vinsældum crossfit æfinga sem heilsubót verður krafan um æfingasvæði í garðinum algengara.



    Sumir hafa svo útbúið lítið gervigrassvæði með lóðum, ketilbjöllum og öðrum lyftingabúnaði. Við sjáum fyrir okkur að á árinu verði íþróttahlutinn tekinn enn lengra. Í flestum görðum má reisa 15 m2 smáhýsi sem fólk hefur nýtt sér á ýmsan hátt. Það má t.d. sjá fyrir sér spinning hjól sem snýr að stórum útsýnisglugga og upphífingarstangir fyrir þá allra hörðustu. Svo má taka svæðið fyrir utan smáhýsið og þekja með tartanefni eða gervigrasi.



    Krakkasvæði fyrir rólegri afþreyingu

    Síðustu áratugi hefur verið ofuráhersla á tækifæri til ærslafullra leikja með rólum, köstulum, og öðrum hreyfiglöðum leiktækjum. Fyrir nokkrum árum tókum við eftir að trampólínin, sem lengi hafa verið vinsælustu leiktækin í görðum, voru ekki bara notuð í hopp og ærsl, heldur áttu krakkarnir það til að liggja hlið við hlið á mjúkri hoppudýnunni horfa upp í himinn og kjafta um heima og geima. Þannig fæddist sú hugmynd að kannski þurfa krakkar líka að fá tækifæri til þess að „hanga“ eins og fullorðna fólkið. Þarna koma rólubekkurinn og hengirólan klassíska sterkt inn.

    Það sem bættist svo við er Krakkaholan. Krakkaholan er óformlegur lítill bekkur með þaki til að hlífa við rigningu. Öll hlutföll miða við einstaklinga í minni kantinum en inn í holuna má hrúga litríkum púðum til þess að kúra sig inn í með iPad eða jafnvel góða bók.


    Hönnun í sýndarveruleika og bráðum í útvíkkaðan veruleika

    Í kringum 2010 byrjuðum við að hanna garðana okkar í þrívídd og ekki liðu mörg ár þangað til allir viðskiptavinir fengu þrívíðar útfærslur af garðinum. Árið 2019 byrjuðum við að vinna með tölvuleikjatækni og sýndarveruleika og 2022 kláruðum við að færa öll verkefni yfir á þetta form. Þannig fá allir viðskiptavinirnir okkar tækifæri til að upplifa garðinn í sýndarveruleika og aðgang að svæði á netinu þar sem hægt er að ganga í gegnum garðinn líkt og í tölvuleik. Sýndarveruleiki er þannig orðin venjulega leiðin til þess að sýna verkefnin okkar.


    Á þessu ári munum við halda áfram að þróa þessa tækni og það mun ekki líða langur tími þar til hægt verður að skoða garðsvæðin í viðbættum veruleika. Þannig mun viðskiptavinurinn geta beint myndavél snjallsímans að svæði i garðinum og sjá á skjánum hvernig það svæði mun líta út. Hvort þetta muni líta dagsins ljós á næst ári er óvíst en það er ekki langt í það.


    Enn minna viðhald og endingarbetri efni

    Fyrir flesta snýst garðurinn meira um afþreyingu en garðyrkju. Þá skiptir máli að viðhald garðsins sé létt en í íslenskri veðráttu mæðir vel á öllum svæðum hans. Úrvalið af pallaklæðningu hefur aukist verulega en þar koma sterk inn efni sem búið er að hitameðhöndla og eins efni úr þjöppuðum lífmassa eins og bambus. Hampur hefur einnig verið nefndur sem heppilegur lífmassi í pallaefni en við bíðum spennt eftir að byrgjar útvegi slíkt. Hellur munu fá uppreisn æru en þær hafa fengið pínu óorð á sig vegna gróðurs sem stundum sest í fúgurnar. Nú býður BM Vallá upp á VarioSand sem er eitt þeirra fjölmörgu efna sem hefur verið notað í fúgur á hellum erlendis en þetta efni er polymereblandað og límist ofan í fúgurnar. Við gerum að sjálfsögðu ráð fyrir að Steypustöðin fylgi fast á eftir með sambærilegt efni fyrir sína viðskiptavini.



    Svo bjóða nokkur fyrirtæki upp á útiflísar en þar fer Vídd fremst í flokki með stórar ítalskar flísar, sem að sjálfsögðu eru fúgaðar með polymereblönduðum sandi til að fá grjótharða og þétta fúgu sem ekki vex gróður í.


    Lóðréttir garðar

    Einnig viljum við spá því að lóðréttir garðar verði algengari. Við höfum skoðað möguleika á að vera með grindur á veggjum þar sem hægt er að hengja blómapotta og gróðurker. Það verður því hægt að rækta matjurtir og skrautjurtir á mun minna svæði en áður. Þessu má líka koma fyrir inni í eða utan á smáhýsum og gróðurhúsum og fá þannig ferskar kryddjurtir allan ársins hring. Ekki er ólíklegt að þessu muni einnig fylgja sjálfvirkur vökvunarbúnaður.

    Sannarlega spennandi þróun!


    Sturtugarður

    Í upphafi árs varð fyrsti sturtugarðurinn okkar til á teikniborðinu. Hugmyndin er fengin frá Ástralíu þar sem fara má í sturtu eða bað í aflokuðum garði með pálmatrjám eða öðrum fallegum gróðri. Í sturtugarði má einnig stunda íhugun eða yoga - allt án þess að eiga á hættu að vera truflaður. Sannkallaður sælureitur í garðinum!


    Japanskt hundaklósett

    Viljum við ekki allt það besta fyrir ferfættu vini okkar? Að okkar mati er japanskt hundaklósett algjörlega brilljant bæði fyrir eigendur og hundana sjálfa. Um er að ræða afgirt svæði þakið möl, grasi, gervigrasi eða trjákurli sem auðvelt er að hreinsa. Stiklur fyrir mannfólkið, fallegt tré sem hægt er að pissa utan í, gróður og grjót til skrauts og allir eru sáttir.


    Sauna með ljósadýrð

    Það er einstök tilfinning að fara í gufubað og við höfum fundið leið til að auka enn við þá upplifun. Fjölbreytt ljós og mild tónlist sem hefur róandi áhrif á hugann lyftir dvölinni í gufubaðinu upp á hærra plan en í þessari gufu líkir loftið eftir stjörnuhimni. Ljósin er síðan hægt að stilla í takt við tónlistina, hvort sem það er rokk, diskó eða ljúf hugleiðslutónlist.



    Útilýsing í görðum

      Á norðurhveli jarðar, þar sem vetrarnætur eru langar og sumarið óþarflega stutt, getur góð garðlýsing fjölgað íverustundunum. Á kvöldin þegar skyggja tekur má nýta lykilsvæði í garðinum til að snæða, skrafa saman eða eiga notalegar samverustundir á annan hátt, t.d. í heita pottinum. Það verður auðveldara að ganga um garðinn, sem getur jafnvel fengið ævintýraljóma, og stuttar rómantískar gönguferðir verða mögulegar allan ársins hring. Góð lýsing getur einnig haft áhrif á útsýni frá gluggum og í mörgum tilfellum stækkað stofu, eldhús eða önnur herbergi húss. Stærsta hlutverk lýsingar í garði er þó í aðkomunni. Íbúar geta komið heim í fallegri birtu hvenær sem er sólarhringsins, lagt bílnum á þægilegan hátt, gengið að útidyrunum og hitt örugglega með lykli í skráargatið.



      Aðkoma og innkeyrsla

      Aðgengi að útidyrum þarf að vera gott á öllum tímum dags og allan ársins hring. Með góðri staðsetningu ljósa á veggjum húss, nálægt götu eða við stíga og bílastæði verður auðvelt að athafna sig á leið að húsi. Margir staðir og margar tegundir ljósa koma til greina en nokkur lykilatriði þarf að hafa í huga. Áður en ný ljós eru valin og staðsett þarf að skoða hvaða lýsing er þegar til staðar. Ljósastaurar við götu geta veitt ljósi inn í garðinn og eins geta ljós sem eru á húsinu lýst upp hluta aðkomusvæðisins. Í aðkomunni má skipta lýsingunni í þrjár tegundir: Lága, háa og óbeina. Lág lýsing getur lýst upp yfirborð stíga og innkeyrslu þannig að gott sé að rata um svæðið. Há lýsing er gagnleg á þann hátt að sá sem stígur út úr bíl eða gengur að húsi getur séð hendurnar á sér og því opnað dyr og séð vel allt það sem borið er inn eða út. Óbein lýsing eykur hins vegar heildarbirtu og með því að beina ljósi að veggjum, gróðri eða skilgreindum svæðum má fá fram endurkast til þess að lýsa upp nálæg svæði.



      Dvalarsvæðið

      Dvalarsvæðið er stofa garðsins og þar má leggja áherslu á að bæta þægindi, mynda skjól og auka lýsingu og fjölga þannig mögulegum tómstundum. Þá nýtist þessi hluti garðsins vel á kvöldin þegar dagarnir eru styttri, t.d. fyrir hvíldarstundir í heita pottinum. Dvalarsvæðið er líka oft það svæði sem sést hvað best innan úr húsinu og er lýsingin því mikilvæg til að tengja saman íbúðarrými innandyra og tímabundin dvalarrými utandyra. Þar skiptir máli að lýsing valdi ekki óþægindum, skeri ekki í augu og flæði ekki mikið inn á nærliggjandi svæði. Oft er því gott að hafa ljós neðarlega þannig að áherslan sé á að lýsa upp yfirborðið svæðisins og lágan gróður í jaðri þess. Á þeim svæðum þar sem mikilvægt er að sjá vel til, t.d. við matborðið, má hafa ljós ofan við augnhæð. Þá getur verið gott að miða við rúmlega tveggja metra hæð og leita að tækifæri til þess að hafa ljós á veggjum, í þakköntum eða á háum staurum. Ef ljós eru sett í þakkanta þarf að huga vel að nálægum gluggum því að ljós sem skín beint inn um glugga getur verið óþægilegt. Grundvallarreglan er því sú að hafa ljós í þakköntum á milli glugga. Ef dvalarsvæði sést vel út um glugga í húsi má setja ljós í garð með tilliti til útsýnis þaðan. Þá eru skilgreind þau svæði sem verða hluti útsýnisins, þau lýst upp og skuggasvæðin látin eiga sig til þess að skilin milli ljóss og myrkurs verði skýrari. Þetta undirstrikar heildarmyndina sem getur gert útsýni úr stofu að listaverki.



      Stígar

      Mikilvægt er að hægt sé að komast um garðinn allan ársins hring, sérstaklega ef aukainngangar eru á húsinu. Stígar tengja saman svæði og því er mikilvægt að huga vel að lýsingu þeirra. Góð lýsing getur undirstrikað liti og form stíganna þannig að upplifunin verði allt önnur á kvöldin en daginn. Þetta er best gert með lágri lýsingu sem lýsir upp stíginn sjálfan, yfirborð hans og útlínur. Til þess að undirstrika formin má setja öll ljósin sömu megin en þá mynda þau línu sem endurspeglar form stígsins. Þannig verða mjúk form bogadregins stígs meira áberandi og skörp form kantaðs stígs að sama skapi skýrari. Ef draga á úr þessum formum og mynda meiri heildarljóma má setja ljós beggja vegna stígsins. Með dreifðri birtu má beina athyglinni að útliti og umgjörð stíganna frekar en að formi og lögun ljósanna.





      Hvað á að lýsa upp?

      Í vel hönnuðum garði eru margir staðir sem vel getur farið á að lýsa upp. Meðal þeirra eru staðir með fallegum runnagróðri, trjágróðri, tjörnum, steinum eða listaverkum. Fallegan gróður má gera enn meira áberandi með því að beina ljósi beint á hann, en einnig með því að baklýsa. Baklýsing felst í því að lýsa upp fleti á bak við áberandi hlut, t.d. formfallegan runna, og skerpa þannig útlínur hans. Einnig má lýsa gróður neðan frá og undirstrika þannig formin í neðri hluta hans. Ef lýsingunni er beint að runna eða tré er þess virði að huga einnig að skuggavarpinu því greinarnar geta myndað listaverk ljóss og skugga. Til að ná þessum áhrifum eru ljóskastarar hentugir en með þeim verða skilin á milli ljóss og skugga skarpari en með ljósum sem dreifa birtunni. Ef tré stendur nálægt vegg og ljósi er kastað að því varpast skuggarnir á vegginn og form og munstur greinanna verða eins og teikning.




      Tegundir ljósa

      Úrval ljósa er mikið og gæðaflokkar misjafnir, bæði hvað varðar endingu og útlit. Við val á ljósum þarf að huga að því hvernig ljósið lítur út á kvöldin þegar kveikt er á því og einnig á daginn þegar slökkt er. Form, litir og umgjörð lampanna geta verið fallega útfærð frá framleiðanda og þá verða lamparnir að sérstöku atriði í hönnun garðsins. Þannig geta köntuð ljós undirstrikað köntuð form í garði og ljós með mjúkum línum endurspeglað bogadregin form svæða, stíga og gróðurs. Mörg garðljós eru framleidd til þess að falla inn í veggi. Þau eru þá lítið áberandi á daginn en varpa fallegri birtu á kvöldin. Einnig eru til margar tegundir af staurum með fjölbreytt útlit og í mismunandi lengdum. Eftir því sem ljós er hærra, því meiri verður lýsingin frá hverju ljósi. Ef lýsa á upp svæði með sem fæstum ljósum borgar sig að hafa þau hátt uppi. Þetta á bæði við um stauralýsingu og ljós sem fest eru á veggi. Á íþróttavöllum eru ljósin hátt uppi, bæði til að minnka líkurnar á að leikmenn og áhorfendur þurfi að horfa beint í ljósið og einnig til þess að hver staur nái að lýsa upp sem stærst svæði. Sama gildir um lýsingu í garði og ef lýsing á fyrst og fremst að vera nytsamleg má hafa ljósin færri og hafa þau hærra.




      Að lokum er vert að minnast á sveigjanlegri lausnir. Þannig geta innstungur í garðinum komið að góðum notum fyrir jólaljós og einnig fyrir ljós sem eru í beðum og gert er ráð fyrir að flytja til eftir því sem gróður vex. Þegar mikið stendur til í garðinum má nota olíuljós og kyndla því opinn eldur gefur rómantísk hughrif og þægilega tilfinningu sem erfitt er að ná með raflýsingu.


      1. Eftir því sem ljósastaurar eru hærri, því stærra svæði lýsa þeir upp.

      2. Sumir ljósastaurar eru hannaðir til þess að beina geislum sínum á vel skilgreind svæði.

      3. Innkeyrsla lýst upp með ljósum sem beinir birtunni á afmarkað svæði í stað þess að dreifa henni.

      4. Innkeyrsla lýst upp með lágum ljósum sem dreifa birtunni.

      5. Innkeyrsla lýst upp með háum ljósum sem dreifa birtunni vel. Hér þarf því fá ljós.

      Stóra teikningin: Með vel skipulagðri lýsingu má gera aðkomuna fallega og fá betri nýtingu úr dvalarsvæðunum.




      Ertu klár í næsta sumar? - Garður teiknaður að vetri

        Updated: Mar 21, 2023

        Veturinn er langsamlega besti tíminn til þess að láta teikna garðinn. Þá gefst góður tími í að velta upp hugmyndum og vinna úr þeim. Á veturna má líka semja við verktaka og framkvæma hluta verksins þannig að það fari ekki allt sumarið í framkvæmdir.



        Garður án teikningar


        Að hanna garð án skipulagðrar teikningar er svipað og að elda flókinn rétt án uppskriftar. Ekkert er til að styðjast við nema eigin tilfinning og reynsla. Vissulega getur útkoman orðið mjög góð en því fylgir nokkur óvissa. Til að forðast óhöpp er mönnum ráðlagt að fylgja uppskriftinni (teikningunni) nokkuð nákvæmlega þó að persónuleg notkun á kryddi geti reyndar verið af hinu góða.


        Horft á sólarlagið úr hengirólu




        Þeir sem láta teikna garðinn sinn hafa af því ávinning á fleiri en einn hátt. Í fyrsta lagi fá þeir í hendurnar teikningu af garði þar sem þeirra eigin óskir spila saman með ferskum hugmyndum hönnuðarins. Væri ekki spennandi að horfa á sólarlagið úr hengirólu á veröndinni, ylja sér við útiarin eða busla í heitum potti? Hverjar eru þínar óskir? Viltu stóra verönd, tvöfalt bílastæði, göngustíga, matjurtagarð eða leiksvæði fyrir börnin? Viltu fallegan ævintýrareit sem tekur sífellt á sig nýjan svip eftir árstíðum? Möguleikarnir eru óendanlegir og öruggt að allir geta fundið eitthvað við sitt hæfi.


        Lítill arfi og létt viðhald





        Margir eru þreyttir á að eyða frístundum sínum í að reyta arfa og hreinsa til í gömlum garði. Aðrir standa frammi fyrir nýjum og ómótuðum garði og vita ekki á hverju best er að byrja. Það er misjafnt hversu mikla vinnu fólk kýs að leggja í garðinn. Með því að skipuleggja hann frá upphafi er hægt að létta viðhaldið og njóta garðsins liggjandi í sólbaði í góða veðrinu.


        Fallegur gróður allt árið




        Vel skipulagður runnagróður hugsar nánast um sig sjálfur. Með því að þekja beðin vel með réttum gróðri kemst sólarljós síður að moldinni og vaxtarskilyrði fyrir illgresi verða mjög léleg. Galdurinn er svo að blanda runnategundum saman á þann hátt að allt árið sé eitthvað spennandi að gerast. Sígrænn gróður fyrir veturinn, fallegt blómskrúð á vorin og sumrin og skrautlegir haustlitir er hluti af því sem góð garðteikning getur fært þér.


        Skjólgóð útivistarsvæði



        Eitt af því sem gerir íslenskum garðeigendum lífið leitt er rokið. Mikilvægt er að staðsetja skjólveggi og runnagróður rétt til að beina vindinum frá. Þannig fást skjólgóð útivistarsvæði sem geta framlengt sumarið og með því að skipta garðinum upp í fleiri en eitt svæði má nýta sólina til hins ýtrasta. Morgunsvæði þar sem morgunsólin er ráðandi og kvöldsvæði þar sem notast er við síðustu sólargeisla dagsins eru meðal þess sem hönnuðurinn tekur tillit til við gerð teikningar. Til að skapa stemningu og öryggi þegar dimma tekur er hægt að gæða garðinn ævintýraljóma með vel staðsettri lýsingu. Með réttri skipulagningu má því lengja þann tíma sem spennandi hlutir gerast í garðinum.


        Samspil við hús og umhverfi


        Þegar komið er að velja hráefnið í garðinn eru möguleikarnir endalausir. Í yfirborð má nota hellur, trépalla, gras, möl og margt fleira. Garðyrkjustöðvarnar bjóða upp á nokkur hundruð tegundir plantna til að skreyta með og veita skjól. Þetta þarf að spila skemmtilega saman með því sem á að vera í garðinum eins og heitum potti, þvottasnúrum og hengirúminu góða. Ef vandað er til verksins er hægt að ná fallegu samspili milli svæða í garðinum, við húsið og umhverfið.



        Góð teikning sparar peninga


        Það getur sparað þér mikinn tíma og umtalsverða peninga að hafa nákvæma teikningu af garðinum þínum til að afhenda verktökum. Öll samskipti við þá verða skýrari. Þú getur gert kostnaðaráætlun og notað teikninguna til að semja við verktaka auk þess að ákveða hversu hratt garðurinn er unninn. Iðnaðarmennirnir geta gengið beint í verkið og allt liggur ljóst fyrir. Ekkert þarf að endurvinna vegna þess að skilaboð til verktaka voru ekki nógu skýr í upphafi. Komi upp spurningar má alltaf kalla hönnuð garðsins á staðinn. Fáir gera sér grein fyrir að kostnaðurinn við gerð garðateikningar er í raun ekki nema um 3-8% af heildarverði framkvæmdanna. Því fæst þóknun hönnuðarins yfirleitt öll til baka með hagræðingunni sem verður við verkið.


        Eftirfylgni á verkstað



        Urban Beat er í samstarfi við Garðaþjónustuna þína og vísar gjarnan verkefnum til þeirra, en þeir eru sérhæfðir í að halda utan um stór og flókin verkefni og eru með færa gröfukalla, smiði, hellulagninga- og hleðslumenn. Sami pípulagningamaður kemur að öllum verkefnum og þeir Askur og Helgi hjá Neista sjá gjarnan um öll ljós og annað rafmagnstengt. Ef samningar takast við Garðaþjónustuna þína fylgir vikuleg heimsókn landslagsarkitekts með eftirfylgni á verkstað á meðan verkefnið er í gangi. Þar eru þau mál sem upp koma í framkvæmdinni leyst.



        Vandaðu til verksins með góðri uppskrift






        Af framansögðu er ljóst að rétt uppbyggður réttur þar sem öll nauðsynleg hráefni spila saman á skemmtilegan hátt fer best í maga og gleður augað. Það sama gildir um garðinn þinn. Sé vandað til verksins og uppskriftin góð er öruggt að þú munt eiga margar veislustundir í garðinum þínum.


        Takk fyrir að lesa :-)




        bottom of page