Garður íþróttaiðkandans

Í garðinum er hægt að útbúa draumaaðstöðu fyrir íþróttafólk og þeirra fjölskyldu. Það eru ekki allir sem vilja bara liggja og slaka á í garðinum sínum. Sumir skemmta sér best þegar þeir eru á fullri ferð og vilja helst eyða frítímanum í alls konar íþróttir og leiki. Fullorðnir jafnt sem börn gætu nýtt sér það að hafa möguleika á að stunda boltaleiki, risaútiskák, klifursport og margt fleira sér til skemmtunar. Aðrir eru kannski á fullu í alvöru æfingarprógrammi, stunda crossfit af krafti eða eru að undirbúa þátttöku í næsta Reykjavíkurmaraþoni. Svo eru það þeir sem stunda reglulega líkamsrækt heilsunnar vegna en finnst of mikill tími fara í það að keyra í og úr ræktinni. Hægt er að hanna allan garðinn utan um íþróttaiðkun eða tileinka ákveðin svæði af honum áhugamálum garðeiganda. Utandyraíþróttir geta verið allt frá sveittum körfuboltaleik og yfir í afslappað pútt eða skák. Til þess að geta stundað sína uppáhaldsíþrótt í garðinum er misjafnt hvað fólk þarf að hafa. Hér eru nokkrar leiðir til þess að koma íþróttunum að í garðinum.

Íþróttavöllur í garðinum

Það eru margar leiðir til þess að búa til íþróttavöll í garðinum og misjafnt hversu mikið púður er lagt í það. Sumir þurfa einfaldlega sléttan grasbala því hann má nota í svo margt. Þar er hægt að fara í leiki eins og stórfiskaleik og fallna spýtu eða stilla upp fyrir kubb og krokket. Lítil færanleg mörk breyta grasinu í fínasta fótboltavöll og svo má vera með körfuboltakörfu á hjólum fyrir leiki sem ekki þarf að drippla í, eins og til dæmis asna. Alvöru körfuboltavelli má líka útfæra í einkagarði. Malbik er algengasta undirlagið fyrir þá því það er ódýrt og mýkra en steypa og hellur. Fyrir suma dugir að hafa eina körfu í innkeyrslunni til þess að eiga þar margar sveittar en skemmtilegar stundir. Það er þó líka hægt að nota tartan með mjög þéttu undirlagi og útbúa heilan völl með tveimur körfum. Gervigras hefur vaxið mikið í vinsældum nýlega enda hafa gæðin á því breyst mikið undanfarin tvö ár eða svo. Það er alveg tilvalið fyrir pútt- eða minigolfvöll.

Græjur og dót

Það eru alls konar skemmtilegar græjur og dót sem hægt er að fá sér í garðinn sem þarf ekki endilega að nota heilan völl undir. Trampólín geta haft ofan af fyrir börnum heilu dagana en þau má líka nota í fantagóða líkamsrækt. Hægt er að fella trampólín niður í gras, gervigras, tartan, pall eða stétt. Almenningsæfingatæki hafa verið að skjóta upp kollinum um allan bæ í Reykjavík og þess konar tækjum má líka koma fyrir í einkagarði. Upphífingar taka á öllum vöðvum líkamans og þeim sem stunda þær af krafti er lofað magavöðvum fyrir allan peninginn. Það er hægt að smíða grind með misháum upphífingarstöngum sem svo getur líka virkað sem klifurgrind. Þeir sem elska að klifra geta líka reist sér alvöru klifurvegg. Skák er líka íþrótt og þeir sem eru fyrir hugarleikfimina geta fengið sér risaútiskák.

Þitt eigið sporthús

Smáhýsi þurfa ekki byggingarleyfi ef þau uppfylla kröfur Mannvirkjastofnunar um að vera þrjá metra frá lóðarmörkum og húsi. Þau mega vera allt að 15 fermetrar og það má tengja rafmagn og vatnsleiðslur. Smáhýsi af þessu tagi getur þú breytt í þitt eigið sporthús með hlaupabretti, æfingarhjóli, róðravél, lyftingabekk og ketilbjöllum. YouTube er stútfullt af góðum æfingamyndböndum svo það gæti verið gott að hafa flatskjá á veggnum. Það er líka alveg nauðsynlegt að vera með góða hátalara og græjur til þess að spila hressa tónlist á meðan maður æfir. Vatnsleiðslurnar má nota til þess að hafa krana með ísköldu vatni, sturtuklefa og jafnvel gufubað til þess að mýkja vöðvana eftir æfingar. Svo er pláss til þess að hafa aðstöðu til þess að skipta um föt. Utan á smáhýsinu má svo vera með skyggni sem myndar svæði sem hægt er að nota fyrir allskonar æfingar, jóga eða crossfit, og til að teygja eftir útihlaup. Jafnvel má koma fyrir stólum þar sem áhorfendur geta setið með drykk í hönd og dæmt boltaleikinn sem fer fram á grasflötinni. Fyrir veiðimanninn sem er staðsettur nálægt veiðisvæðum, til dæmis í sumarbústað, er hægt að nota smáhýsi sem veiðikofa. Þar er hægt að geyma veiðigræjurnar, skipta í og úr skítugum veiðigalla og hnýta flugur.

Eftir hamaganginn þarf að kæla sig niður

Eftir útihlaup og annan hamagang er gott að skella sér í kaldan pott til að kæla sig niður. Sjósund og kaldir pottar njóta sívaxandi vinsælda. Hvort sem þú hefur lagt í það að prófa sjósund eða ekki þá hefur þú örugglega heyrt af því hvað kaldur pottur er frábær fyrir heilsuna. Þeir geta staðið einir og sér en eru líka flott viðbót við baðsvæði með heitum potti eða við hliðina á smáhýsi með gufubaði. Það er nefnilega talið mjög gott fyrir blóðrásina að stunda heit og köld böð til skiptis. Á baðsvæðinu má líka skoða að setja upp útisturtu fyrir íþróttafólkið. Fyrir þá sem hafa nóg pláss er ekki út úr myndinni að steypa sundlaug sem hægt er að æfa í. Hún þyrfti að vera tveir til þrír metrar að breidd og fimmtán metrar að lengd til þess að nýtast í sundæfingar.

https://video.wixstatic.com/video/586ab2_cca0478d86dd497f8bc23660c8ae7515/1080p/mp4/file.mp4

Lokaorð

Hvaða íþrótt það er sem þú stundar, þá er ljóst að möguleikinn á að stunda hana í þínum eigin garði er til staðar. Nema kannski ef þú stundar fallhlífarstökk eða brimbretti. Sértu meira fyrir boltaleiki og hefðbundnari líkamsrækt þá er ekki vitlaust að skoða það hvernig best er að hanna garðinn þinn með það í huga. Komdu golffélögunum á óvart með óaðfinnanlegum púttleik eftir allar æfingarnar í garðinum. Komdu þér í frábært form eða viðhaltu því sem þú ert nú þegar í í þinni eigin einkalíkamsræktarstöð. Bjóddu félögunum yfir í körfuboltaleik sem endar svo með köldum bjór undir skyggninu. Kenndu krökkunum skák á útiskákvelli eða leyfðu þeim að losna við aukaorkuna á trampólíni. Fólk á öllum aldri getur sameinast í skemmtilegu leikjum eins og kubb. Endaðu svo daginn á böðum í köldum potti á milli þess sem þú hlýjar þér í gufubaði.

Góða skemmtun og takk fyrir að lesa :-)

Hvernig er útieldhúsið skipulagt?

Það kannast allir við það hvernig besta partýið á það til að myndast inni í eldhúsi, hvort sem veislan var skipulögð í kringum máltíð eða ekki. Að borða kvöldmat utandyra er eitthvað sem við gerum ekki oft hér á landi en það er ákveðin upplifun, útlandafílingur, sem fylgir því. Hvernig væri að sameina þetta tvennt og halda einstakt útieldhúspartý?

https://video.wixstatic.com/video/36f62a_ae14a448d9c84f3f9bfb4927fff7665b/1080p/mp4/file.mp4

Hér skoða Björn og Sjöfn Þórðar fallegt útieldhús með glæsilegu útsýni

Útieldhúspartý - ógleymanleg kvöldstund.

Með fullbúnu útieldhúsi er það og svo ótalmargt fleira mögulegt. Ímyndaðu þér frídag um sumar, einn af þessum dögum þar sem sólin skín og sólbaðssvæðið í garðinum er í notkun allan daginn. Þegar kvöldmatartíminn nálgast tímir enginn að fara inn enda sólin ennþá hátt á lofti. Þú ert búinn að bjóða fólki í mat en sem betur fer þarf enginn að fórna sér í það að standa einn inni að elda meðan hinir hafa það áfram gott á pallinum. Þegar gestirnir mæta tekur ilmur af grillmat á móti þeim og þeir fá sér sæti í kringum grillið. Þeir fá jafnvel aðeins að narta og smakka á forréttunum jafnóðum og þeir eru tilbúnir. Humar, rækjur, ýmiskonar grænmeti og smáréttir hverfa eins hratt og þeir birtast. Aðalrétturinn, lambasteikin, er búin að malla á lægsta hita inni í ofni í allan dag. Eftir forréttinn er gestunum boðið að setjast inn í borðstofu og gæða sér á hægelduðu kjötinu. Þegar allir eru saddir færist partýið aftur út í garð þar sem boðið er upp á kaldan bjór úr kælinum sem er innbyggður í útieldhúsið. Grillaðir bananar með súkkulaði eru líka í boði fyrir þá sem enn hafa pláss fyrir mat. Kveikt er á hitalömpunum og svo er setið úti og spjallað langt fram á kvöld.

Skemmtilegt útieldhús undir skyggni sem tengist við pergólu

Hvar er best að staðsetja útieldhús?

Hvort sem útieldhúsið er uppi í sumarbústað eða í garðinum heima þá er lykilatriði að það sé staðsett í skjóli fyrir regni og vindum, til dæmis undir skyggni. Sé vel að því staðið er mögulegt að elda og borða úti sama hvernig viðrar, jafnvel allt árið um kring. Best er að útieldhúsið snúi mót vestri til þess að kvöldsólin nái að skína undir skyggnið. Tenging við og fjarlægð frá húsi skiptir líka miklu máli. Sé hægt að hafa útieldhúsið beint við hliðina á því sem er innandyra þá er það mikill kostur, að minnsta kosti er heppilegt ef stutt er þar á milli. Það er betra að stutt sé í ísskáp og borðstofu, sérstaklega ef partýið á að færast inn og út á þægilegan hátt. Við hönnun útieldhúss þarf að gera ráð fyrir svæði til þess að undirbúa matinn, elda hann, bera hann fram og aðstöðu til þess að þrífa eftir á.

Matjurtagarðurinn ætti líka að vera nálægt útieldhúsinu. Það á að vera stutt að fara til að ná í heimaræktaða grænmetið sem á að grilla, það gerist ekki meira lókal. Það er ekki bara hentugt að hafa kryddjurtirnar nálægt, þær geta líka verið falleg skreyting fyrir útieldhúsið.

Útieldhús með vinnuborði og föstum bekk

Gasalega flott kolagrill

Margir Íslendingar eru með grill úti á palli en það er algengt að það vanti vinnuborð. Væri aðstaðan betri þá fengi grillið sennilega meiri notkun. Það er ekki alveg sama stemningin í matarboðinu ef gestgjafinn þarf að hoppa út til að grilla steikina á meðan gestirnir eru inni. Í útieldhúsi geta allir hjálpast að við að undirbúa aðalrétt og meðlæti, elda matinn og borða hann.

Þegar kemur að búnaði þá er grillið aðalmálið. Margir kjósa gasgrill og í þeim flokki eru Weber grillin mjög þekkt. Hægt er að fá gasgrill í öllum stærðum og gerðum, grill með hellu fyrir sósuna, með teini til að grilla heilan kjúkling, steina til að baka pizzur á og margt fleira. Gasgrillin eru einfaldari í notkun heldur en kolagrillin, en sumir halda því fram að það sé ekki alvöru grillbragð af matnum nema grillað sé með kolum. Kolagrill geta líka verið mjög flott og þægileg í notkun, til dæmis „eggin“ frá The Big Green Egg. Hönnun þeirra gerir það að verkum að hægt er að stýra hitanum mjög nákvæmt. Þau eru til í mörgum stærðum og eru einstaklega falleg. Náskylt grillinu er svo eldofninn en í honum er til dæmis hægt að baka gómsætar pizzur og brauð. Ooni Koda pizzaofninn er gasofn sem er léttur og getur staðið á steinplötunni á vinnnuborði útieldhússins. Þeim sem er alvara með útieldhúsinu fá sér tvö grill eða bæði grill og eldofn!

https://video.wixstatic.com/video/586ab2_f7a22007048845a9b11182109e4c643a/1080p/mp4/file.mp4

Hönnun og aðrar græjur

Þú vilt hanna útieldhúsið þannig að það fái sem mesta notkun. Mikilvægt er að hafa vinnuborð og helst barborð með stólum. Þar geta gestir setið og spjallað við kokkinn, fylgst með eldamennskunni og verið plataðir til að taka þátt í henni.

Útieldhúsinnréttingin ætti að innihalda lítinn kæli, grænmetisgeymslu, skápa fyrir krydd og borðbúnað, snaga fyrir grilláhöldin, eldrauðu grillsvuntuna og pottaleppana. Nú fást Röshults útieldhús hjá Eirvík en þau eru samsett úr einingum og þola allskyns veðurfar. Vaskur kæmi sér vel til þess að vinna með matvæli eins og fisk og annað sjávarfang. Kælir úti hefur þann kost að þá myndast meira pláss í kælinum inni. Fyrir utan matinn sem á að grilla ætti útikælirinn að geyma drykki fyrir gesti og þá er gott að staðsetja hann við endann á innréttingunni svo gestirnir komist auðveldlega í hann. Þeir mega ekki verða þyrstir þó þú sért að sýna þeim hæfileika þína við eldamennskuna.

Röshults útieldhús frá Eirvík

Standi til að borða úti getur verið gott að hafa sérstakan borðbúnað fyrir útiveislur. Það eru þá þykkari diskar sem þola meira hnjask, til dæmis diskar úr þykkum leir. Það má líka tengja rafmagn í útieldhúsið svo hægt sé að hafa rafmagnshitara, falleg ljós, útihátalara og jafnvel hrærivélina úti. Fyrir pizzaveisluna er hægt að hnoða deigið úti og henda beint í eldofninn.

Glæsilegt útieldhús umlukið gróðri

Partíið heldur áfram í útiborðstofunni

Hvernig væri að vera sá eini í vinahópnum sem heldur alvöru garðveislur? Þar sem þægindin eru í fyrirrúmi og hægt að gleyma sér úti fram eftir öllu? Alveg eins og í eldhúsi eða borðstofu innandyra eiga borð og stólar heima í útieldhúsinu. Góðir hitalampar eru nauðsynlegir, hvort sem það eru rafmagnshitarar sem festir eru í skyggnið eða stórir gaslampar sem standa sér, eða jafnvel bæði. Það er betra að hafa of marga möguleika á að hita upp útisvæðið en of fáa! Hér á landi er algengast að nota rafmagnshitara. Rafmagnstenglana má líka nota fyrir ljósaseríur til að skapa stemningu og útihátalara til þess að halda partýinu gangandi.

Kannski verður næsta þriggja rétta grillveisla haldin alfarið utandyra.

Takk fyrir að lesa :-)

Garður með lágmarksviðhaldi

Garður sem þarfnast lítils viðhalds er draumagarður margra minna viðskiptavina. Að geta slakað á í heita pottinum án þess að hafa samviskubit yfir beðum troðfullum af arfa eða mannhæðarháu grasi. Væri ekki frábært ef garðurinn þinn væri hannaður þannig að vinnu við hann væri haldið í lágmarki? Og þú fengir þannig meiri tíma til að halda grillpartí fyrir nágrannana eða fara í fótbolta með krökkunum? Flestir vilja eyða tíma sínum í garðinum í afslöppun og tómstundir, ekki vinnu. Ýmsar leiðir eru færar til að minnka viðhald garðsins og mig langar að fjalla aðeins um þær.

Sjálfvirk sláttuvél eða pall úr trefjaefni

Það sem helst dregur úr viðhaldi garðsins er að auka hlutfall af hörðu yfirborði og stendur valið yfirleitt á milli steinsteypu, hellna og trépalls. Ég vil líka benda á að grasflatir geta verið þægilegar í viðhaldi séu þær hannaðar með það í huga. Það sama á við um gróður. Nútímalegar lausnir eru til dæmis gervigras, sjálfvirkar sláttuvélar og trefjaefni á palla. Svo er alltaf mögulegt að einfaldlega ráða einhvern annan til þess að sjá um vinnuna fyrir sig. Í því samhengi getur verið gott að bera saman stofnkostnað og viðhaldskostnað. Pallar og hellur geta kostað sitt og þeim fylgir líka ákveðið viðhald svo það er ekki alltaf besta lausnin að losa sig við allt grasið fyrir pall. Síðan gefur auga leið að litlir garðar þurfa vanalega minna viðhald heldur en stórir.

Partí á pallinum

Trépallar hafa marga kosti og hafa lengi verið vinsælir. Þeir hafa hlýlegt yfirborð sem er fljótt að hitna í sólinni og geta þannig aukið notkun garðsins á heitum sumardögum. Þeir eru líka fljótir að þorna eftir rigningar, bæði vegna þess að rigningin hripar vel niður milli klæðningarborða og síðan hrindir vel varinn viður frá sér bleytu. Trépallar henta því afar vel við heita pottinn. Þar sem fjörug börn eru á ferðinni er mjúkt yfirborð trépallsins mikill kostur og hentar því mjög vel leikja. Trépallar geta verið mjög fjölbreyttir í lögun og formi og mismunandi að stærð. Sumir eru sáttir með pláss fyrir tvo sólstóla á meðan aðrir vilja geta haldið ættarmót á pallinum.

Liturinn getur skipt máli

Trépallar þurfa ákveðið viðhald. Þegar pallurinn er smíðaður skiptir máli að það lofti um grindina, því það kemur í veg fyrir að raki sitji á timbrinu og minnkar líkur á fúa. Gott er að bera á pallinn á eins til tveggja ára fresti. Yfirleitt er notuð viðarvörn með litlu litarmagni, en liturinn minnkar áhrif sólarljóss á viðinn og er eins konar sólarvörn. Ef mikill litur er í viðarvörninni geta slitfletir á palli orðið áberandi. Grái liturinn sem hefur verið í tísku undanfarið fæst með því að leyfa sólarljósinu að upplita pallinn. Gagnvarin fura er algengasta efnið í pallagerð, hún er bæði ódýrust og auðvelt að vinna með hana. Lerki og harðviður eru einnig í boði og að lokum má nefna ýmis konar viðarlíki sem gjarnan er að uppistöðu úr trefjaplasti. Þar sem mikilvægt er að viðhald sé í lágmarki getur plast verið hagstætt en það er yfirleitt gert úr endurunnum efnum.

Rekaviðargrátt lerki eða grjóthart Bangkirai?

Á pall úr furu þarf að bera viðarvörn til þess að verja slitfleti og annað yfirborð. Aðrar timburtegundir þurfa svipað viðhald nema tekin sé ákvörðun um að láta yfirborðið grána. Bæði lerki og ýmsar harðviðartegundir hafa þann eiginleika að gráminn, sem myndast af verkun sólarljóssins, nær aðeins til ysta lagsins. Þannig er yfirborðið grátt en innviðirnir halda sínum eiginleikum. Steypugrái liturinn sem kemur á pallinn á þó ekki alls staðar við og því þurfa þessar timburtegundir oft sama viðhald og furan. Það er auðvelt að lita furuna því hún drekkur vel í sig liti. Greni og lerki, sem bæði teljast til mjúkra viðartegunda, hafa svipaða eiginleika. Lerkið er þó frábrugðið að því leyti að þegar það er sagað lokast æðarnar í viðnum og ver það hann fyrir raka. Ýmsar harðviðartegundir hafa verið notaðar í yfirborð palla, t.d. Bangkirai frá Indónesíu og Masaranduba frá Brasilíu. Einnig hafa eik, mahóní eða beyki verið notuð, en þessar tegundir þarf oftast að sérpanta í gegnum timbursölur. Með því að nota harðvið næst fram óvenjuleg áferð og litir með meiri dýpt þar sem útlit timbursins skín í gegnum viðarvörnina. Þegar unnið er með harðvið þarf að nota sérstök blöð í sagir og bora til að bora fyrir skrúfum og festingum. Ending framkvæmda úr harðviði er gjarnan lengri og viðurinn hefur sérstakan blæ sem tilkominn er vegna sýnilegra æða í viðnum.

www.byko.is

Stórar hellur og grófur sandur í fúgur

Hellulagnir geta auðveldað viðhald og um leið sett mikinn svip á garðinn en steyptar hellur og timbur eru algengustu yfirborðsefnin á dvalarsvæði. Hellur má fá í ýmsum stærðum og gerðum og er úrvalið mjög fjölbreytt. Hellurnar sjálfar þurfa lítið viðhald en það getur þurft að hreinsa yfirborð og fúgur. Einnig getur verið gott að skipta út sandi í fúgum en það er gert með því að hreinsa með kraftmikilli vatnsbunu og sópa svo nýjum sandi í. Því stærri sem hellurnar eru minnkar magnið af fúgum en mestu máli skiptir þó að þær séu fúgaðar rétt. Í stað þess að nota aðeins pússningarsand sem fýkur í burtu þegar hann er þurr, er hægt að nota grófari sand sem þjappast betur í fúgurnar. Þegar fúgur eru hreinsaðar með háþrýstidælu þarf að sanda á eftir, annars getur lífrænt efni úr umhverfinu, lauf, mold og gras, auðveldlega fyllt upp í eyðurnar.

Svo má líka steypa veröndina

Húseigendur geta einnig valið um hellulagðar eða steyptar stéttir. Þeir sem velja að steypa frekar en að helluleggja gera það af mismunandi ástæðum, en ein þeirra er að koma í veg fyrir að mosi og gróður vaxi í fúgum. Með þessu er viðhald í lágmarki því ekki þarf að skafa kanta eða hreinsa úr fúgum eins og algengt er með hellur. Skrautsteypu þarf að sílanbera svo upphaflegt útlit haldi sér. Nú er algengt að nota steypu sem er slípuð og svo eru söguð í hana þenslubil sem mynda mynstur.

www.bmvalla.is

Hringlaga grasflatir eru auðveldastaar

Þó svo að garðsláttur sé í litlu uppáhaldi hjá mörgum þá getur góð grasflöt verið auðveld í viðhaldi. Atriði sem mestu skipta varðandi viðhald grasflata eru halli, lögun og hvernig gróður er valinn og staðsettur við flötina. Ef mikill halli er á flöt getur sláttur verið erfiður og því þess virði að nota léttar sláttuvélar eða vélorf. Auðveldustu grasflatirnar eru hringlaga og lausar við gróður í miðjunni. Á slíkri flöt þarf aldrei að bakka með vélina. Því mýkri sem formin eru og færri skörp horn, því þægilegra er að slá. Ef runnar næst grasflötum eru þéttir að neðan má leyfa grasflötinni að renna undir gróðurinn og sleppa þannig við kantskurð. Gróður í beði á miðri grasflöt kallar á aukið viðhald en einnig getur trjá- og runnagróður á grasflöt myndað skugga sem getur ýtt undir vöxt mosa.

Láttu róbottinn sjá um málið

https://video.wixstatic.com/video/36f62a_08e0505bf3df4acfa6da787c2ae30ff2/1080p/mp4/file.mp4

En til hvers að slá grasið sjálfur þegar þú getur látið vélmenni um það? Mörg fyrirtæki eru farin að framleiða slátturóbota og má þar nefna Honda, Husqvarna og John Deere en tegundirnar eru mun fleiri. Þetta er eins og að vera með Roomba úti í garði. Þeir sem vilja ekki að þurfa að slá grasið í garðinum yfir höfuð ættu líka að skoða möguleikana í gervigrasi. Það hefur vaxið í vinsældum í einkagörðum undanfarið enda hafa gæðin aukist mikið á síðustu tveimur árum. Í dag er hægt að fá fallegt gervigras og augljóslega fylgir þeim mjög lítið viðhald.

Þéttir runnar sem þekja vel

Flestir vilja hafa gróður í garðinum sínum, líka fólk sem ekki vill þurfa að sinna viðhaldi. Til þess að losna við að reita arfa er best að velja þétta runna, til dæmis rifsplöntur, hélurifs og kirtilrifs. Þær laufgast mjög snemma, þekja vel moldina og kom þannig í veg fyrrir að arfi vaxi upp. Best er að planta þeim þannig að beð séu vel þakin. Þá kemst birtan síður að moldinni og við þær aðstæður vex illgresi síður og umhirða beða minnkar mikið.

Að leyfa öðrum að sjá um viðhaldið

Síðast en ekki síst er vel þess virði að skoða kosti þess að láta aðra sjá um viðhald garðsins. Hugsaðu þér að þurfa ekki að lyfta litlafingri en vera með garð í toppstandi allt sumarið! Ég heyrði í honum Brynjari Kærnested hjá Garðlist og spurði hann út í kostnað við að fá þjónustu frá þeim. Hann gaf mér dæmi um 700 fm garð. Sé grasflötin slegin í 7 skipti yfir sumarið kostar hvert skipti 11.780 kr. Heildarkostnaður er þá 82.460 kr. yfir sumarið.

Ef við miðum við að garðurinn sé þrifinn þrisvar yfir sumarið er tímagjald fyrir beðahreinsun 6.076 kr. með vsk. Í meðalgarði taka slík þrif um 15 tíma en sorphirða og akstursgjald er 10.000 kr. Því kostar hver hreinsun 101.140 kr. og kostnaður yfir sumarið er þá 303.420 kr.

Heildarkostnaður við að halda garðinum óaðfinnanlegum allt sumarið er þá 385.880 kr. með vsk. Að láta fagmenn sjá um viðhaldið er kostur sem sífellt fleiri eru að velja.

www.gardlist.is

Takk fyrir að lesa :-)